شرح رائع لدرس العالم غداة الحرب العالمية الأولى بالدارجة المغربية
مقدمة
فالفترة نتاع 1914 و1918 وقعات الحرب العالمية الأولى، وكانت بين دول تسماو بدول الوسط لي هما (ألمانيا، الإمبراطورية النمساوية الهنغارية، الإمبراطورية العثمانية، بلغاريا) وبين دول أخرين تسماو هما بــ دول الوفاق أو الحلفاء وهاد الدول هما (فرنسا، بريطانيا، الولايات المتحدة الأمريكية، إيطاليا، روسيا القيصرية)، وسالات الحرب بيناتهم بفوز دول الحلفاء. هنا تانطرحو سؤال، شنو هي النتائج السياسية والاقتصادية للحرب العالمية الأولى أسيدي ويا لالة؟
مؤتمر الصلح ومعاهدات السلم
√ انعقد مؤتمر الصلح بباريس سنة 1919.
- أول حاجة كانت بعد نهاية الحرب العالمية الأولى هي دار واحد المؤتمر تسمى مؤتمر الصلح 1919 بباريس. دار هاد المؤتمر فواحد الظروف كما غادي نذكروها لتحت وقعوا بزاف ديال الخسائر نتاع بنادم (بشرية) وفالفلوس (مادية) قاسحة فأوروبا. هاد المؤتمر حضروه غي الدول لي ربحوا لي هما دول الوفاق أو الحلفاء ودوك الدول لي مسانداهم، أما الدول لي خسروا فالحرب لي هي دول الوسط ماحضروش لمؤتمر، زيد عليهم روسيا الاشتراكية وقتها تاهي ماحضراتش. (أودي مارضاوش هههه).. هادي ظروف لي دار فيها المؤتمر.
دابا نهضرو على مواقف الدول الكبرى داخل المؤتمر وانشوفو كل دولة أش تاخذات من موقف:
- فرنسا: قالت لك أسيدي ويا لالة أنا مامفاكاش تانصفي حساباتي مع ألمانيا، وكي أديري لها أماما فرنسا؟ غادي نضعف ألمانيا كليا... أهاه.
- بريطانيا: قالت لك خاصنا نخلقوا توازن أوروبي.
- الولايات المتحدة الأمريكية: قالت لك خاصنا نعاودو نشوفو فالعلاقات الدولية من خلال 14 مبادئ لرئيس أمريكا Wilson.
- إيطاليا: طالبات أنها ترجع أسيدي ويا لالة شي مناطق محتلاها النمسا.
من بعد ما ذكرنا ظروف لي دار فيها هاد المؤتمر ومواقف كل دولة من الدول المنتصرة، أجيوا نشوفو قرار المؤتمر، قرروا يديرو معاهدات سلم مع الدول لي نهازمو، وكانت هاد معاهدات السلم سنتي 1919 و1920، لي كان فيها شروط صراحة قاسحة، ولي هي:
-
أولا: معاهدة فرساي مع ألمانيا: لي بفضلها رجعات فرنسا جوج مناطق ديالها هما "الألزاس" و"اللورين" + فرنسا قطعات أراضي من ألمانيا لفائدة الدول المجاورة، وبالتالي ألمانيا فقدات المستعمرات ديالها، والأكثر من هادشي حطات واحد المنطقة سميتها "السار = sarre" تحت إشراف عصبة الأمم، نزيدكم الجيش الألماني تم تخفيض ديالو، وتلغات الخدمة العسكرية + تفرض على ألمانيا غرامة مالية بزااااف بمعنى غالية، وآخر حاجة تم تجريد السلاح من منطقة "الراين" بمعنى زولو السلاح لهاد المنطقة لي هي "الراين".
-
ثانيا: معاهدة سان جيرمان لي كانت مع النمسا: ولي كان مضمونها تْفصل هنغاريا عن النمسا، ويتعتارف باستقلال القوميات السلافية لي خاضعة النفوذ النسماوي.
-
ثالثا: معاهدة نويي Neuilly لي كانت مع بلغاريا، ومعاهدة تريانون Trianon مع هنغاريا (المجر): هاد المعاهدتان تضمنوا أنه يتقتطعوا بعض الأراضي من هاد البلدين لصالح الدول المجاورة.
-
رابعا: معاهدة سيفر Sevres ولي كانت مع الامبراطورية العثمانية: للأسف هاد المعاهدة بسببها تفككات الامبراطورية العثمانية من بعد ما اقتُطعت أراضيها لي فأوربا لصالح الدول المجاورة مثل اليونان + تفرض الانتداب (ويعني شكل استعماري) الإنجليزي والفرنسي على المشرق العربي.
فهاد الفقرة غادي نهضرو على التحولات الترابية والسياسية لأوروبا بعد مؤتمر الصلح وتنظيم العلاقات الدولية.
- مجموعة من تغييرات ترابية وقعات على الخريطة السياسية نتاع أوروبا ولي من أهمها:
- خْتَفات جوج ديال الامبراطوريات لي هما: الامبراطورية العثمانية و الامبراطورية النمساوية الهنغارية.
- غنهاريا نفاصلات عن النمسا.
- الدول لي كانت مساندة دول الحلفاء توسعات على حساب الدول لي نهازمات ولي هي دول الوسط، مثال لهاد الدول لتوسعات رومانيا مثلا.
- بانت دول جديدة بحال يوغوسلافيا، تشيكوسلوفاكيا، دول (البطريق) ههه عفوا دول البلطيق ههه :D (إستونيا - ليتونيا - ليتوانيا).
من بعد، عصبة الأمم بحثات باش تنظم العلاقات الدولية أجيو نشوفو كيفاش:
- في سنة 1920 تأسسات هاد عصبة الأمم (League of Nations) وختارت جنيف يكون مقر ديالها فيه، وكان هدفها ضمان السلم العلمي، وتْعزز التعاون الدولي من خلال بوابة أنها طرح بعض المبادئ لي من بينها:
- عدم اللجوء للقوة العسكرية من أجل حل الخلافات بين الدول
- احترام القانون الدولي والمعاهدات الدولية.
وباش تحقق عصبة الأمم هاد الأهداف ديالها، عتامدات على هاد الأجهزة لي هي:
- المجلس الأعلى: هاد المجلس تايعاقب أي دولة خالفات مقتضيات عصبة الأمم.
- الأمانة العامة: هاد الجهاز تايتكلف بالأعمال الادارية.
- الجمعية العامة: تايقوم هاد الجهاز بمناقشة القضايا لي تتهدد السلم العالمي ويتاخذ قرارات بخصوصها (بمعنى هاد القضايا).
- محكمة العدل الدولية: مهمة ديالها أنها تفصل فالنزاعات القانونية لي تاتكون بين الدول.
ولكن للأسف عصبة الأمم فشلات باش تحقق الأهداف ديالها، وداكشي راجع لبزاف نتاع العوامل منها:
- عصبة الأمم كانت غي أداة باش تخدم صالح الدول الاستعمارية، بالخصوص انجلترا وفرنسا.
- الولايات المتحدة الأمريكية مانظماتش لهاد العصبة، وهذا كان عامل آخر باش تفشل عصبة الأمم.
- بزاف نتاع الدول نساحبات من عصبة الأمم فمقدمتها ألمانيا، وإيطاليا، واليابان.
- الثقل الاقتصادي العالمي نتاقل لــ خارج أوروبا.
هاد المحور أنهضرو فيه على تدهور الاقتصاد الأوروبي من بعد الحرب العالمية الأولى:
-
كلشي تايعرف بلي أوروبا هي لي كانت ساحة نتاع الحرب العالمية الأولى، وبالتالي هادشي تايعني خسائر بشرية ومادية بزااااف عرفاتها أوروبا، ومنين سالات هاد الحرب أوروبا واجهات بزاف نتاع المشاكل عندها علاقة كيفاش غادية تنتاقل من اقتصاد الحرب إلى اقتصاد سلمي، أي أن أوروبا نخافض الانتاج الفلاحي والصناعي نتاعها، والمبادلات التجارية الأوروبية تراجعات، وبالتالي المداخيل المالية نتاع أوروبا نقصات، (وكما تانقولو ماقدو فيل زادوه فيلة)، أوروبا كانت النفقات مرتفعة بزااااااااف، وبالتالي الدول الأوروبية عرفات الميزانية ديالها واحد العجز كبير، بسبابو لجأت باش تاخذ كريدي من على برا خاصة الولايات المتحدة الأمريكية، وهادشي غادي يدخلها فمشكل آخر لي هو (أسيدي ويا لالة) ترااااااااكم الديون (كحلاتها أوروبا ههه).
-
فالمقابل شي دول ماشي أوروبية ستافدات من ظروف نتاع الحرب العالمية الأوروبية والمخلفات نتاعها لي خلات.
هنا الولايات المتحدة أيطلع لها "لكراد" وأدير جنحين، حيث الولايات المتحدة الأمريكية منين كانت الحرب العالمية الأولى، كانت قوية اقتصادياً بزاف، وزادت صادراتها للمواد الفلاحية والصناعية، وولات أول قوة اقتصادية عالمية.
