شرح رائع لدرس الحرب العالمية الثانية(1939و1945) بالدارجة المغربية
◇مقدمة:
فالفترة مابين 1939 و 1945 وقعات الحرب العالمية الثانية بين دول تسماو بدول المحور لي هي (ألمانيا النازية {الله على هتلر هه}، إيطاليا الفاشية، اليابان) وبين دول الحلفاء لي هي (فرنسا، بريطانيا، الولايات المتحدة الأمريكية، الاتحادالسوفياتي)، إذن شنو هي أسباب هاد الحرب؟ وشنو هي نتائج ديالها الاقتصادية والاجتماعية؟ هادشي لي غادي نشوفو لتحت تبعوا معيا.
* أسباب نتاع الحرب العالمية الثانية:
1)
ساهمات مخلفات نتاع معاهدات الصلح + الأزمة الاقتصادية باش تبان أنظمة
ديكتاتورية + ساهمات حتى فتوثر العلاقات الدولية أسيدي ويا لالة.
2)
كما تانعرفو كاملين أن معاهدات الصلح فرضات على الدول تنهازمات فالحرب
العالمية الأولى فرضات عليها شي أمور بها قياداتها ترابيا وعسكريا وماليا،
هادشي غادي يكون سبب باش تبان أحزاب لي هي قومية متطرفة (تاتعني
بالقومية المتطرفة: القومية الشديدة التي تروج لمصلحة دولة واحدة أو شعب
واحد قبل كل الآخرين"، أو ببساطة "الإخلاص الشديد لأمة الفرد)فهاد
البلدان المنهزمة، فمقدمة هاد الأحزاب كما تانعرفو، الحزب الناري الألماني،
برئاسة السي أدولف هتلر، هاد الحزب طرح بزاف نتاع المبادئ لي من بينها
القومية المتطرفة، العنصرية، الديكتاتورية، التوسع +أخيرا مناهضة
الديموقراطية والاشتراكية، بمعنى أسيدي ويا لالة هاد هتلر كان ديكتاتوري
فعقلو.
3)
ثالث حاجة، هي أن الحكومات الأوروبية واليابان ماقداتش أنها تواجه المشاكل
الاقتصادية والاجتماعية لي كانت عندها علاقة بأزمة 1929، وهادشي كان سبب
باش تزاد نفوذ نتاع الأحزاب المعارضة اليمينية المتطرفة، وبالتالي كانت
النتيجة نتاع هادشي هي بانت أنظمة ديكتاتورية كما ذكرنا فمقدمتها النظام
النازي الألماني.
4)
هتلر منين وصل لحكم سنة 1933 بدا يفكر باش يتخلص من معاهدة فرساي، وباش
يتفاك من القيود نتاع هاد المعاهدة بدا يعمم فالخدمة العسكرية الاجبارية
بمعنى بززززز عليك دير الخدمة العسكريو + حاول يطور فالصنع نتاع الأسلحة، +
هتلر قام بتسليح منطقة " الراين " + فنفس الوقت يرجع منطقة السار Sarre.
هادشي كامل نتاع الخدمة العسكرية وصناعة السلاح وتسليح منطقة " الراين "
واسترجاع منطقة السار Sarre كان غي باش يتخلص من القيود نتاع معاهدة فرساي.
5)
الأزمة الاقتصادية منين وقعات، نتاشر ما سمي بــ " الحماية الجمركية " ولي
تاتعني (واحد التذكرة تاقررها شي دولة باش تحمي ولا تشجع على صناعتها
المحلية، وهادشي عن طريق أن هاد الدولة تاتحط نسبة جمركية كبيرة على السلعة
ديالها لي تاتستوردها، ولي تاتافس البضائع لي بحالها المصنوعة محليا،
وهادشي كان باش تروج الدولة الصناعة الوطنية، وبالتالي المواطنين أيتشجعو
على باش يشريوها فظل هاد الأزمة الاقتصادية.) هاد الحماية الجمركية كانت
سبب باش ينوضو المواجهات بين الديمقراطيات الغربي لي هي ( بريطانيا، فرنسا،
الولايات المتحدة الأمريكية)، وبين الأنظمة الفاشية، هاد المواجهات كانت
غي بهدف شكون يحكم الأسواق لي على برا (الخارجية)، وبالتالي يمتالك
المستعمرات.
*فهاد
الفقرة أنهضرو على التحالفات والتوسعات نتاع الأنظمة الفاشية، ولي كانت
التحالفات والتوسعات سبب باش تنوض الحرب العالمية الثانية، تبع معايا باش
نعرفو هاد التحالفات والتوسعات:
+ تحالفات نتاع الأنظمة الفاشية كانت فهاد النقط لي لتحت:
- القرب نتاع إيطاليا وألمانيا كان سبب باش تحكم جبهة " ستريسا Stressa
-
ألمانيا النازية مع إيطاليا الفاشية تحالفوا مع القوميين المنطرفين
فإسبانيا منين وقعات الحرب الأهلية الاسبانية ولي تسالات بقيام نظام
الديكتاتوري فرانكو Franco.
-
تم إنشاء ما سُمي بمحور برلين وروما وطوكيو: ولي هو إلى بغينا نعرفو به،
حلف عسكري تايضم دول ألمانيا وإيطاليا واليابان، وعليها تسمى مِحور برلين
وروما وطوكيو.
+
دابا سالينا من التحالفات نتاع الأنظمة الفاشية، أجيو نشوفو التوسعات نتاع
هاد الأنظمة الفاشية، ولي يمكن نحددوها فهاد النقط الخمسة لي لتحت:
- اليابان حتالات منطقة منشوريا بالصين.
- إيطاليا دارت غزو لأبيوبيا.
- ألمانيا أسيدي ويا لالة ضمات النمسا، باش تكون ما سُمي بــ " الأنشلوس ".
- ألمانيا ماوقفاتش غي حد هنا، بل ستولات على منطقة " السوديت " + ومعظم أراضي تشيكوسلوفاكيا فإطار المجال الحيوي.
- ألمانيا مازالة طامعة ههه، أسيدي ويا لالة ألمانيا غزات الأراضي البولونية.
 أجيوا دابا نشوفو مراحل نتاع الحرب العالمية الثانية:
الحرب العالمية الثانية دازت من جوج مراحل لي هي:
+ المرحلة الأولى ( 1939-1942)
فهاد المرحلة لولى، دول المحور قدرات باش تحقق توسعات كبيرة، أجيو نشوفو كيفاش:
-
الحرب العالمية الثانية بدات بتوسع كبير نتاع ألمانيا فأوربا، هاد التوسع
قدر الجيش نتاع (لاَلِيمَان هههه) عفوا، بغيت نقول الجيش نتاع ألماني باش
يحتل بلدان أوربا الشرقية، ويدخل فالأراضي السوفياتية + قدر باش يحتل
البلدان الاسكندنافية لي هي ( النمارك - السويد - النرويج - فنلندا )+ ولات
هولندا وبلجيكا والليكسمبورغ تحت سيطر نتاع الجيش الألماني. وفسنة 1940
بالضبط فشهر يونيو ألماني حتالات فرنسا، وقدرات دير فيها - ففرنسا - حكومة
تابعة الألمانيا، كان تيرأسها بيتان Petain، وهاد الحكومة تعرفات بسمية
"فيشي"
-
الجيش الألماني تحالف مع الجيش الايطالي باش يسايطروا على شبه جزيرة
البلقات + ماشي غي لهاد الغرض كان هاد التحالف بيناتهم حتى باش يقويو من
النفوذ نتاهم فليبيا، ويتوسعوا كثر على حساب دولتي تونس ومصر ( الله
أميمتي فين كانو العرب ؟؟؟؟؟؟؟؟)
-
أما اليابان قدرات باش تحقق توسع كبير، وقدرات تحتل بلدان جنوب شرق أسيا
وجزر المحيط، ومانساوش اليابان قدرات باش ضرب القاعدة العسكرية الأمريكية
لي سمتيها " بيرل هاربور "، لي كان بسبب هاد الضربة نتاع القاعدة ديالها من
طرف اليابان، الولايات المتحدة الأمريكية دخلات فهاد الحرب تاهي.
 في المرحلة الثانية (1943-1945 )
فهاد
المرحلة تقلبات البردعة على الشواري ههه، منين كانت الحرب فلول لصالح دول
المحور، ولات الحرب فالمرحلة الثانية لصالح دول الحلفاء، أجي يا سيدي ويا
لالة نشوفو كيفاش:
- قدرات دول الحلفاء أنها تحقق الانتصارات الأولى نتاعها على دول المحور ابتداء من أواخر سنة 1942(عقلوا مزيان على تواريخ).
-
حيت قدر الجيش الأحمر السوفياتي باش ينتاصر فمعركة " ستالينغراد "، وبدا
تايحرر الأراضي نتاعو من النفوذ الألماني النازي، من بعد قدر عاوتاني هاد
الجيش السوفياتي باش يحتل بلدان أوربا الشرقية.
-
الحاجة الثالثة، فهاد المرحلة الثانية من الحرب، هو أن الحلفاء الغربيون
نزلوا القوات نتاعهم فالمغرب والجزائر غي باش يحرروا تونس من النفوذ
الألماني والايطالي، وفنفس الوقت الجيش الانجليزي ومن مصر بدا يحرر ليبيا.
وانطلاقا من تونس تقدمت قوات الحلفاء الغربيين شمالا وقدرات أنها تحتل على
إيطاليا وطيح بالنظام الفاشي سنة 1944.
-
الحلفاء نزلوا القوات ديالهم فـ منطقة نورماندي . وتمكنوا باش يحروا
فرنسا سنة 1944. من بعد هاددشي حتالوا على بلجيكا وهولندا والليكسمبورغ.
-
قوات الحلفاء بدات من بدايت نتاع 1945 باش يغزيو الأراضي الألمانية ،
هادشي تسالى باستسلام نتاع الجيش الألماني سنة 1945 بالضبط شهر ماي.
-
فهاد المرحلة الثانية كذلك من هاد الحرب، بدا الجيش الأمريكي من جزيرة
ميدواي وجزر الكنال وبحر الكوزل باش يواجه الجيش الياباني فـ جزر المحيط
الهادي. وباش يعجلوا بنهاية هاد الحرب العالمية الثانية القوات الأمريكية
لاحت القنبلة الذرية على مدينتي هيروشيما وناكازاكي فــ سنة 1945 بالضبط
فشهر غشت .وبالتالي ستسلم الجيش الياباني.
* فهاد الفقرة أنهضرو على النتائج الاقتصادية والاجتماعية لهاد الحرب العالمية الثانية :
-
اقتصاديا
- لي تضرر من هاد الحرب هي الدول لي تحاربات اقتصاديا منغير الولايات المتحدة الأمريكية، خرجات من الحرب سالمة هه.
-
فالدول الأوربية + إفريقيا الشمالية + اليابان، تْأَدَاتْ الاوضاع
الاقتصادية نتاعها ونقصات، علاش هاد المناطق تدهورات الأوضاع الاقتصادية
نتاعها؟ - حيث هاد البلدان أو المناطق هي لي كانت ساحة نتاع المعارك. الدول
الأوربية تأثرات بزاااف من هاد الدمار الاقتصادي، وعاشت عاود عجز مالي،
خلاها مرة أخرى تمشي تاخذ كريدي من برا، وزادت ثاني ففرض الضرائب.
-
أما الاقتصاد نتاع أمريكا بقى سالم غانم ماوقع ليه والو ( كيت حنا وأوربا
وقتها هه كلينا الدق) ونزيدكم، الاقتصاد الامريكي عرف واحد تطور كبير وبقى
مستمر، ولكن واخا هاكاك الولايات المتحدة الأمريكية عاونات الدول الأوربية
الغربي وقدمات ليها مساعدات اقتصادية، وهاد المساعدات ماشي غي هاكاك ولكن
في إطار مشروع واح المشروع تسمى بــ بمشروع مارشال، ولي كان الهدف نتاعو
ينتاعش اقتصاد نتاع عاد البلدان + التصدي للمد الشيوعي.
- اجتماعيا
- هاد الحرب خلات خسائر بشرية اجتماعية كبيرة، وصلات هاد الخسائر البشرية لي
خلاتها الحرب العالمية الثانية مليوووووووووووووووووووووووووووووووون
قتيلا .. أوااااااااااااه وهادشي إضافة لملايين نتاع الناس لي تعطبوا
فالحرب، وأرامل ويتامى خلاتهم الحرب...بلا مانساو أن الحرب العالمية
الثانية كانت سبب باش تزاد نسبة البطالة والفقر + انتشار وارتفاع
المتشردين، وهادشي كان سبب باش تأسس واحد الهيأة تسمات بــ " هيئة الاغاثة
والتعمير التابعة للأمم المتحدة "
 خاتمة
الحرب العالمية الثانية، خلات لينا خسائر بشرية ومادية كبيرة وقاسحة أثرات بشكل كبير فالعلاقات الدولية.
