التغيير لي كاتحلم تشوفو فحياتك غايبدا من الداخل ديالك
باغي تنجح فحياتك أو تشد الباك إن شاء الله قرا هادشي للتحت مزيان
انشطاين قال من الكلاخ تبقا دير نفس الشيء و تنتظر نتائج مختلفة .
باغي تشوف التغيير فحياتك و باقي محافظ على نفس التفكير و نفس العقلية لي ربما وصلتك للفشل و باقي عايش بنفس العادات السلبية .. بغيتي تشوف التغيير دوز للفعل ماتسناش تغيير يجي راسو را مستحيل بقيتي تسنا تما .
بغيتي مستواك فالدراسة يتطور قرا راجع و خدم و غاتشوف التغيير بغيتي خدمة خرج قلب عليها الى مالقيتيش زيد قلب ماعندكش شي خيار اخر عمرها غاتجي دق علك الى ماقلبتيش .. صحتك ضعيفة دير الرياضة و تهلا فراسك بالماكلة .. كاتشوف بأن حالتك النفسية متدهورة قرا كتب ديال تطوير الذات و عرف المشكل لي كاتعاني منو و بحث ليه على الحل ..... أي حاجة بغيتيها دير علاش باش تحصل عليها و التغيير لي كاتحلم تشوفو فحياتك غايبدا من الداخل ديالك ماشي من بارا ﴿إِنَّ اللّهَ لاَ يُغَيِّرُ مَا بِقَوْمٍ حَتَّى يُغَيِّرُواْ مَا بِأَنْفُسِهِمْ﴾.
دير فبالك أن التغيير ممكن و حتى حاجة مامستحيلة بشرط تيق فراسك و تكون عندك رغبة كبيرة باش دير هاذ التغيير .. كيفما بغات تكون الوضعية ديالك دابا راه ممكن تغير و تولي أحسن ما كاتوقع خصك غير تنوض و تنفض داك الغبار لي معشش فدماغك بأنك غاتبقا فاشل حياتك كاملة و بأنك ماعندك زهر و بأنك ضعيف الشخصية ... شوف تيق بيا كيفما بغات تكون شخصيتك ضعيفة حساسة عندك الوسواس ... هاذشي كامل ممكن يتبدل و تولي حسن و تطور شخصيتك للأفضل، كيف كانقول خصك غير تاخد البادرة و تجرء تغير راسك و تغير حياتك.
ماتسناش شي حد يجي يغير حياتك فبلاصتك ! حياتك الى ماغيرتيهاش براسك تاواحد ماغايعقل علك حيت كلشي مشغول بحياتو و ماتبقاش تعطي لراسك مخدر الاعذار باش تنعس و تسبي كلشي فالامور الخارجية و تلعب دور الضحية !! بحال هاكا غاتزيد غير تكفس الامور و ماغاتستافد والو و راك كاتكدب غي على راسك ! تحرك نت مامحتاج لتاواحد محتاج لراسك لا غير محتاج ضرب تمارة الى بغيتي تعيش ديك الحياة لي كاتحلم بيها .. محتاج تيق فراسك و تخشي راسك فينما كان و تقاتل حتى توصل لداك نيفو لكبير لي كاتحلم بيه ! حايد الكسل و تماطل الى فعلا كنتي باغي تشد الباك أو تغير حياتك أو تفرح ولديك و توصل لأهدافك.
