تحفيز رائع من أجل الحصول على البكالوريا
كلمة مستحيل كاينة غير فعقلك !
"قراوا هادشي مزيان للتحت يلاه قاومو من أجل حصولكم على البكالوريا''
كلمة مستحيل كاينة غير فعقلك ! شي حاجة دارها واحد اخر يمكن لك حتى نت ديرها و تفوتها بشرط تيق بنفسك و تحايد الخوف و تخرج من منطقة الراحة ديالك و دير حوايج جداد فحياتك و تعلم كل نهار و طور من راسك .
كلشي بين ايديك طريق النجاح باينة و طريق الفشل حتى هي باينة و نت لي كتختار اينا وحدة تمشي فيها ! الى نجحتي قول انا لي نجحت و بتوفيق الله أما الى فشلتي ماتسبيها فحتى حد حيت حتى واحد ماغايعقلك علك و حتى واحد ماغايسمع لأعذارك .
أنت المسؤول الوحيد على الفشل ديالك و الى ماكانتش عاجباك شي حاجة فحياتك تحمل مسؤوليتك و غيرها ماتبقاش غير تشتكي حيت الشكوى ماغاتوصلك لحتى حاجة ! و ماتكونش من داك النوع لي دغيا كايأس و دغيا كيستسلم مني كايشوف الطريق بدات كاتصعاب و الأمور غادا و كاتعقد .. خصك تعرف أنه حتى حاجة ماساهلة و فنفس الوقت حتى حاجة ما مستحيلة .
بمجرد أنك تيق فراسك و تعقد العزم و ضرب تمارة و تسهر الليل غير باش تحقق داكشي لي بغيتي كلشي غايسهال .. و ديما البداية كاتكون صعيبة و الأغلبية كيوقفو في البداية ولكن غير هادوك لي باغين يوصلو ديال بصح و كيتنفسو الهدف ديالهم هوما ليغايمشيو بعيد و غايوصلو لداكشي لي بغاو ..
مايمكنس لينا نكونوا ناجحين إلا الى كنا مستعدين نفشلوا فداكشي لي بغينا نجحوا فيه و الى ماكناش مستعدين للفشل فهذا يعني أننا مامستعدينش للنجاح حتى هو .. و دير فبالك أن أغلب هادوك لي نجحوا فشلوا مرارا و تكرارا و لكن عمرهم فكرو يهبطو اديهم و يستسلمو حيت في الواقع الفشل الحقيقي هو الاستسلام ...
أما ماحد الانسان كيفشل و كيعاود يحاول و يطيح و يعاود ينوض هذا ماكيتسماش فشل !
قرا على السير الذاتية ديال الناجحين غاتلقاهم أكثر الناس فشلوا فحياتهم و رغم ذلك واصلو و نجحوا ..
و الي فشلتي حاول تاخد درس من هاذ الفشل و فكر فطرق أخرى لي توصل للهدف ديالك و ماتسمعش لهدرة بنادم حيت كاين لي ماحاملكش تنجح غايدير كل جهدو باش يحطمك و يوقفك ! نت كون ذكي خود هادشي كحافز لك باش تواصل و تحقق داكشي لي بغيتي رغما عن انف أي حاقد جا فطريقك .. ماتخلي حتى واحد يتبت لك بأنك ماقادرش توصل .. نت قادر دير شحال من حاجة كاتعتقد أنها مستحيل باش تحقق ! حايد هادوك الحدود لي واضع فدماغك و حلم كبيييير و واصل التقدم و ان شاء الله ربي غايسر لك و غاتنجح.
