شرح مجزوءة المعرفة بالدارجة المغربية من أجل تسهيل فهمها
شرح مجزوءة المعرفة بالدارجة المغربية من أجل تسهيل فهمها وضبطها جيدا
أولا: شرح المفاهيم
اشنو هي المعرفة :
المعرفة : اسيدي ألالة هي اي حاجة كتعلمها وتولي عارفها مثلا في الاول كتكون (ي)ماعارف(ة) والو ف الطبخ ولكن مع الوقت كتعلم (ي)وتعرف(ي) كيفاش تطيب (ي)مزيااان ووليتي عارف(ة) مزيااان وبهاكا تكونات عندك شي حاجة سميتها المعرفة هادي هي المعرفة .
وكاينة التجربة : هي شي حاجة جربتيها مزيااان .. تعلمتي ليها هيا الاول عاد جربتيها أو وليتي كطير(ي) فيها بحال طموبيل قبل متركب(ي) فيها تعلمتي ليها ومن بعد وليتي طيارة فسياقة هادي هي التجربة .
اما التجريب : هي لي كايدير العالم كياخذ واحد النظرية وكايمشي المختبر وكايطبقها وفهاد المختبر كاين بزاف الشروط عاونوه يطبق بحال المجهر والمكبر وبزاف الالات ساعدوه في التجربة ديالو هذا هو التجريب.
من بعد معرفنا او شرحنا المفاهيم الأساسية لكيتكون منها المفهوم الأول من مجزوءة المعرفة لهو مفهوم النظرية والتجربة.
دبا غادي نطرقو المحاور لكيتكون منها هذا المفهوم او غادي نعالجو الإشكالات لكيطرحها كل محور او نبسطوها بطرقها سهلة 👇 اوا تبع(ي) معايا
غانبداو دبا، بالمحور الاول لي كاين فهاد المفهوم لي هو التجربة والتجريب
راني شرحت ليكم الفوق مفهومي التجربة والتجريب او اش كنعنيو بيهم
اول حاجة غانبدا بيها دبا هي الاسئلة او الإشكالات لكيطرحهم هذا المحورو وغانجاوبوا عليهم من خلال المواقف الفلسفية لتبنوها الفلاسفة ديال هذا المحور يلاه ركزو معايا مزيان .
أول سؤال عندنا هو ما دور التجربة والتجريب في بناء المعرفة العلمية؟ (بمعنى أشنو هو الدور ديال التجربة والتجريب باش نبنيووالمعرفة العلمية) وهل التجربة العلمية تقصي العقل في بناء المعرفة العلمية ؟ وهل التجربة العلمية تشترط وجودهما معا لبناء اي معرفة علمية؟ ام يكفي وجود احدها لبناءها في استغناء عن الأخر ؟( بمعنى واش التجربة العلمية كاتقصي لينا العقل باش نبنييو المعرفة العلمية ولا ضروري منهم بجوج ولا غير واحد فيهم على الاقل ؟)
👆👆 هادو هوما الاشكالات او الأسئلة لي كيطرحها هذا المحور غادي نجاوبو عليهم من خلال مواقف الفلاسفة
ومن بعد كاين موقف الفيلسوف رونيه طوم معارض لموقف الفيلسوف بكلود برنار
هنا رونيه طوم كيعارض بزاف برنار وكيقول باللي العقل مهم باش نبنيو المعرفة العلمية حيت العقل فيه بزاف الحوايج مهمين بحال (الابتكار . الابداع .التخيل...)هاد الامور كايخليوو كايعاونو في بناء المعرفة العلمية مثلا كاين بعض الظواهر علمية ميكروفزيائية مانقدروش نديرو ليها التجربة بوحدها ضروري ليها من العقل اذن هنا العقل لعب دور كبير بزاااف باش نعرفو بزاف القوانين العلمية وبزاااف الحقائق العلمية وبالتالي ضروري مانجمعو مابين التجربة الذهنية(العقل)والتجربة العلمية باش نوصلو لبزاف المعارف العلمية .هنا كنكونو سلينا من المحور الأول ندوزوا المحور التاني من هذا المفهوم
*************************
دبااا غانمرو المحور الثاني ديال العقلانية العلمية
وفهاد المحور غانشرح اولا مفهوم العقلانية أشنو هي العقلانية اسيدي ألالة ، العقلانية : هي أنك (ي) تخدم(ي) عقلك يعني كنعطو الاسبقية للعقل باش نوصلو المعرفة العلمية الى باغيت نبني واحد المعرفة نعطي الاولوية للعقل يعني العقل مهم ومن هنا جات العقلانية .
دبا غادي ندزو نشوفوا الإشكالات او الأسىئلة لكيطرحها لنا هذا المحور او غادي نجاوبو عليها من خلال مواقف الفلاسفة. الإشكالات : ما هي ماطبيعة العقلانية العلمية؟ وهل هي ثابتة أم متغيرة ؟وهل العقلانية العلمية تتأسس على العقل؟ ام على العقل والتجربة معا ؟
وغانبداااو باول فيلسوف لي هو محمد اركون: لي كايقول باللي العقل الغربي داز من بزاااف المراحل (بلاتي علاش دوا على العقل الغربي وماهضرش على العربي حيت العقل الغربي سبقنا بزاااف هوما لي عندهم بزاااف الاكتشافات والمعارف علينا حنا وبقاو ديما كايتطورو ماشي بحالنا)المهم داز من بزاف المراحل بدا من مرحلة العقل اللاهوتي (يعني داك العقل القديم لي كيأمن بالخرايف والاساطير والكنيسة هي كلشي يعني الحاجة لي قالتها الكنيسة صحيحة سواء بصح ولا لا ومايقدرش شي واحد يتحدا الكنيسة ...ومن بعد العقل وصل لمرحلة النقد والحداثة يعني كايتطور هنا اي حاجة كايشك فيها مابقاتش شي حاجة سميتها الكنيسة كلشي تغير وهنا في ولاو الاكتشافات العلمية وولا العقل مستقل بوحدو ولكن واخا تستقل ولكن بقا ثابت ماكايتحركش يعني كيوصل لشي معرفة جديدة ولكن مايقدرش يتحرك ويطورها،ومن بعد جات مرحلة العقل المعاصر هنا العقل وصل لمرحلة الثورة يعني ولا كايقلب ويتطور وولا كايبدع ويتخيل ويبتكر مزيااان يعني العقل ولا مهم وهنا فين جاء رونيه طوم واينشتاين...
ومن بعد كاين الفيلسوف أولمو لي فرق مابين العقلانية المطلقة (التقليدية . الكلاسيكية) وهاد العقلانية فيها العقل هو الطريق باش توصل الحقيقة فقط،يعني ماتقدرش تبدع وتبتكر وتحرك بعقلك عندك الحق تفسر وتفهم وتفكر باش توصل الحقائق فقط وهنا فين كان ديكارت . يعني كتحيد الغبار على شي امور كانت فطرية يعني داك الكلام ديال الكنيسة هاد العقلانية الكلاسيكية هي لي كذباتو وحيداتو ولكن ماقادرتش طور اكثر فقط، ورات لبنادم الصحيح من الغلط . وكاينة كذلك العقلانية النقدية (المعاصرة )هاد العقلانية فور فور فور يعني واعرة هي فين ظهر انشتاين وفهاد العقلانية ولا الابتكار والانفتاح وولات بعض الحقائق جديدة على بنادم بحال النسبية ديال اينشتاين والتجربة الذهنية
*************************
المحور الثالث معايير علمية النظريات العلمية
قبل منبداو معالجة هذا المحور خصنا نطرحو مجموعة من الإشكالات لكيطرق لها هذا المحور وهذه الإشكالات هي كالتالي : ما هي معايير علمية النظرية العلمية؟ وما هو معيار صلاحيتها، هل هو مطابقتها للتجربة أم في قابليتها للإختبارات المتكررة، أم قابليتها للتكذيب والتفنيد ؟
يعني باش غانعرفو واحد النظرية واش بصح علمية ولا لا، هادشي لي غانجاوبو عليه فهاد المحور
وغانبداو بأول فيلسوف لهوا اينشتاين لي كايقول باللي ديك التجربة التقليدية (المنهج التجريبي +الملاحظة . الفرضية. . التجربة . استنتاج)مابقاوش قاديين الغرض حيت العقل تغير وحتى المعرفة العلمية ولا متطورة يعني خاصنا ضروري من المنهج الاكسيومي الرياضي (وهاد المنهج كايخليك ماتفوتش واحد التماسك منطقي ديال الرياضيات (مثلا اي نظرية علمية خاصك تدير ليها الميزان ديالها هو الرياضيات (1+1=2ديما كتساوي 2الى بغيت تجيب معادلة جديدة ضروري ماطبق عليها منهج قديم في الرياضيات باش كايخليها متماسكة ومتناسقة . وهاد المنهج الاكسيومي كانديروه فالنظرية الفيزيايية المعاصرة . يعني كندخلو العقل الرياضي في بنائه . هادشي لي كايقول اينشتاين (المنهج الاكسيومي معيار صلاحية النظريات العلمية ).
وكاين دوهيم لي كايقول الى بغينا نعرفو واحد النظرية واش علمية ولا لا ضروري لينا من التحقق التجريبي يعني كنديرو اختبار لديك النظرية العلمية ب4 تجارب يعني كتديرو ليها التجربة اربع مرات باش نتحققو منها حيت التجربة هي اساس النظرية وهي باش غانعرفو واش صحيحة ولا خاطئة والى مادرناش التجربة لديك النظرية اذن ديك النظرية ليست علمية .
وكاين كارل بوبر لي كايقول باللي القابلية للتزييف هي المعيار باش نعرفو واش النظرية العلمية صحيحة ولا لا والقابلية للتزييف هي ( ديك النظرية نديرو ليها الفحص والتدقيق ونقلبو على البلايص لي فيهم الاخطاء والعيوب ونحيدوهم . وكيفاش غانديرو لهاد الفحص . نقدرو نديرو هاد الفحص والتدقيق بالتجربة ولا المنهج الاكسيومي ولا اي حاجة المهم نقلبو على الاخطاء باش نتزيفوش في العلمية ديالها واش صحيحة ولا لا يعني اي نظرية راه قابلة للتزييف كيفما بغات تكون هذا هو القابلية للتزييف .
تتمة شرح باقي مفاهيم مجزوءة المعرفة سنتطرق لها في الحصة المقبلة بإذن الله.
