شرح خطوات ومراحل تحليل ومناقشة أي نص فلسفي طرح لكم سواء في إمتحانات القسم أو في الإمتحان الوطني
خطوات تحليل أي نص فلسفي
نضعكم الأن من الشرح :
☆ أول حاجة خصك تبدا بها فتحليل ومناقشة أي نص فلسفي تحط ليك سواء في امتحانات القسم او في الإمتحان الوطني هو أنك خصك تقرا داك النص الفلسفي مزيان تقراه حتى أربع أو خمس مرات أو تعرف إنا مجزوءة كينتمي لها أو إنا مفهوم بالضبط عيعالج أو إنا محور بالضبط تطرق له منين تعرف هاشي هنا غادي دوز تكتب المقدمة ديالك.
المقدمة :
خصك تبدها بواحد التقديم عام حول المجزوءة التي ينتمي إليها النص المطروح أو هذا التقديم متفوتش فيه واحد أربعة أو خمسة أسطر(علاش قلت ليك خصك تبدا بواحد التقديم عام حول المجزوءة التي ينتمي لها النص الفلسفي لعندك باش الورقة ديالك تكون متميزة على هذاك لكيبدا المقدمة مباشرة بيتأطر أو يندرج او هذه المصطلاحات ولاو مكروهين عند الأساتذة او بمجرد كيلقاك بدي بكلمة يتأطر أو يندرج كيعرفك بلي غير واخد منهجية من الأنترنيت جاهزة او هنا كطيخ فالفخ )
من بعد مديرتي تقديم عام حول المجزوءة التي ينتمي إليها النص المطروح كتجي الخطوة الثانية لي خاصك تحدد لنا المفهوم الذي يعالجه النص المطروح (واش مفهوم الشخص أو الغير أو التاريخ المهم على حياب المفاهيم ديال كل مجزوءة)
أو فالخطوة الثالثة خصك تحدد لنا القضية المركزية لكيعلجها لنا داك النص الفلسفي أي أنك خصك تحدد لنا المحور الذي يعالجه وفي الخطوة الرابعة خصد دكر لنا المقارقة (أو المفارقة هي الإختلافات التي وقعت بين العديد من الفلاسفة حول هذه القضية الفلسفية أي حول هذا المحور )
الخطوة الأخيرة هي خاصك طرح الإشكالات التي يجيب عنها النص ؟ (بزاف ديال التلاميذ كيلقاو صعوبة في طريقة طرح الإشكالات المناسبة لذلك غادي نوركم طريقة ساهلة باش تبقاو تخرجو أو طرحو الإشكالات بكل سهولة يلاه تبعو معايا)
أولا: نطرح سؤال حول المفهوم اللي كيهدر عليه النص لعندنا مثلا إلا كان النص لعندك كيهدر على مفهوم الشخص كنطرحو سؤال بحال هكذا(ما الشخص؟).
تانيا:هنا نطرحو سؤال حول المحور لكهدر عليه النص لعندك مثلا إلا كان النص لعندك كيهدر على محور محور الشخص والهوية كنطرحوا سؤال بحال هكذا(وما هو الهحدد الرئيسي لهويته؟).
ثالثا: هنا كنطرحو سؤال على النص لعندنا كنشوف النص علياش كيهدر وكنطرحو سؤال علية مثلا إلا كان نص كيهدر على أن هوية الشخص ثابتة هنا نطرح سؤال هكذا (وهل هويته ثابتة أم متغيرة).
التحليل :
أول حاجة كنطرقو لها فالتحليل هي الأطروحة ديال النص بمعنى أخر مضمون النص (بمعنى كتقرا داك النص الفلسفي لعندك أو كتشوف شنو بغا يقولنا فيه صاحب داك النص هداكشي لبغى يقول لنا هو الأطروحة )
الخطوة الثانية من بعد خاصك تشد داك النص الفلسفي لعندك أو تقسمو لفقرات او تقول لنا فكل فقرة شنو بغا يقول لنا فيها صاحب النص .
الخطوة الثالثة خصك تجبد المفاهيم الاساسية لكاينة فداك النص أو كتشرحهم على سبيل متال " شخص ، هوية ، . ضرورة ، قيمة ، منين كنجبد داك المفاهيم لكاينن فداك النص وكتشرحهم خصك دير العلاقة لكتجمع بنتهم (واش هي علاقة ترابط وانسجام أم علاقة تعارض وكتشرح علاش جمعت بنتهم داك العلاقة)
الخطوة الرابعة لخاصني نطرق فيها البنية الحجاجية أي خصني نجبد من النص الحجاج لستعملو صاحب النص باش يدافع عن الأطروحة ديالو ويأكد لنا بأنها صحيحة......ومن بين هذه الأساليب الحجاجية : أسلوب تأكيد ، تفسير ، استنتاج .... جميع أساليب كتجبدهم من مورها كنديرو استنتاج جزئي لداكشي لشفنا فالتحليل أو من مورها خصنا نديرو سؤال إنتقالي ليخلنا نتقلو به من مرحلة التحليل إلى مرحلة المناقشة.
(غادي تقولي كاع مكنعرف نطرح هاد سؤال إنتقالي شنو ندير متخافش كولشي عندو الحل غادي نوريك واحد سؤال انتقالي يمكن تستعملو فأي نص فلسفي تحط ليك وهو كالتالي(فإلى أي حد يمكن لهذه الأطروحة أن تقدم لنا جوابا نهائيا لهذه القضية الفلسفية؟وهل هناك أطروحات أخرى تعالج هذا الإشكال من رؤى وزوايا مختلفة؟)
■ المناقشة :
مرحلة المناقشة تنقسم إلى قسمين مناقشة داخلية ومناقشة خارجية.
1-المناقشة الداخلية كنطرقو فيها لقيمة أطروحة النص أي أننا كندكرو فيها إيجابيات ديك الأطروحة ديال النص أو كندعموها بشي موقف ديال شي فيلسوف كيقول نفس الهدرة لقال لنا صاحب النص
2- مناقشة خارجية كنديرو فيها حدود الأطروحة اي السلبيات ديالها او كنجيبو شي موقف ديال شي فيلسوف كيقول عكس ديال الهدرة لقال صاحب النص أو المؤيد ديالو فالأخير ديال المناقشة خصنا نديرو واحد استنتاج جزئي لداكشي لشفنا فالمناقشة في حدود سطرين عن ماتمت مناقشة.
الخاتمة:
فالخاتمة خصنا نديرو فيه استنتاج عام لداكشي لشفتي فمرحلة التحليل والمناقشة.
يعني فالخاتمة غادي تخرج بخلاصة حول داكشي كامل لشفتتي هي هذا النص الفلسفي لعندك زعما شنو فهمتي منو ،ثم أنك تهضر على أنه عطانا مجموعة من المواقف المتعارضة، بين مؤيد ومعارض، هنا غادي دير المؤيد لأطروحة النص بلا مدكر شميتو وتعطي خلاصة لأطروحته ( علاش قلت لك غي خلاصة باش مطحوش فالتكرار نتاع الهضرةة ديالو غادي تعطي غير تلخيص ديال ديك الهدرة لقال في سطر صافي )، ثم موقف الفليسوف المعارض باختصار كذلك أوماتنساش ملخص الأطروحة ديالو، وفالأخير خاصك تصيغ إشكال مفتوح.
غادي تقولي كيفاش غادي ندير نطرح هاد السؤال المقتوح متخافش غادي نورك كيفاش تبع معايا مثلا إلا كان السؤال لعندك كيهدر على هل معرفة الغير ممكنة هنا كنطرحو سؤال كيفتح على المحور لمور هذا مثلا فإذا كانت معرفة الغير ممكنة فهل يمكنه ربط علاقته بالأخرين والتعابش معهم؟ شتو هكذا طرحنا السؤال بطريقة ساهلة أوذكية. (ديما كنطرحو سؤال انتقالي حول المحور الذي يلي المحور الذي يعالجه النث المطروح واش مفهوم ).
▪ بالمناسبة المنهجيات باش تخدمو راه حطيتهم لكم هنا فالمدونة جاهزين يمكنكم الإطلاع عليهم والعمل بهم فهم من إعدادنا الخاص.
√ دير متابعة للمدونة باش إوصلك كل جديد ان شاء الله
ولا عجبتكم طريقة الشرح هذه نكمل لكم باقي المنهجيات بنفس طريقة الشرح.
مدونة نديرو اليد فاليد من الحصول على البكالوريا تتمنى لكم النجاح والتوفيق.
